Tuesday, August 27, 2013

يهود اليمن I صور Jewish of Yemen












ساعات غريبه وجميله I صور watches odd



















Sunday, August 25, 2013

تكفى ترى تكفى تهز الرجاجيل ... ولولا صروف الوقت ماقلت تكفى


الشاعر / محمد الدحيمي


علم العفا وعفاك يا وافي الكيل
بساطه أبشّرك في خير وعفا

نكفي بعضنا وانتكافا على الشيل
واللي تعب من الحطّ والشيل يكفا

من ذاق حرّ القايله يعشق الليل
ومن شبّ ضّوه ليلة البرد يدفا

لاعاد ليلٍ ٍ كنت به في حرى سهيل
وخايلت نوضٍٍ يخطف العين خطفا

امسيت من جيل ٍ ولا هوب ذا جيل
واصبحت والاّ ديرتي شبه منفا

كنّا على فال الشحم والمعاميل
ونفوسنا انقى من نقى العدّ واصفا

وانا ولو راحت بقولت : تساهيل
صلف وصروف الوقت تحتاج صلفا

ياترج جدّاني زحول الرجاجيل
يحرم فلا لي عنك ياترج مقفا

إمّا لطمنا العيل والاّ الطم العيل
مادام شبّ النار مندوب الأطفا

خل ابرهه الأشرم على ذمّة الفيل
وانظر لشيٍ مايوصفّه وصفا

ياذيل والله ماتجي راس ياذيل
علمٍ ماهو يغبى ولاهوب يخفا

واللي حما بيته بطيرٍ ابابيل
ماجيتك ادوّر لمن راح واقفا

ولا جيتك اطلب منك بن ٍ ولا هيل
جيتك وجرح الظلم غاديه يشفا

جيتك بكلمة كنّها صعقة الويل
إن قلت تكفى . لا تهاون بتكفى

تكفى تراها كلمةٍ تقطم الحيل
لا بالله الا تنسف الحيل نسفا

تكفى ماهي لمعقبين الفناجيل
تكفى لصلف وعادة القرم صلفا

تكفى ترى تكفى لها هدرة السيل
في صدر حرًّ ينتف الطيب نتفا

تكفى ترى تكفى لها تسرج الخيل
إن كان لك بالخيل سرج ٍ و عسفا

تكفى تبيّن كلّ لاشٍ وحلحيل
سمع لها بالصدر هبدٍ ورجفا

تكفى وتكفى ماتساق لمهابيل
تكفى تخلي القرم لاشٍ وهطفا

تكفى تجنّبني هل القال والقيل
مانيب من ينكف على كل ملفا

تكفى تراني من قروم ٍ مشاكيل
حمّاية الساقه بسيفٍ وشلفا

تكفى ترى تكفى تهز الرجاجيل
ولولا صروف الوقت ماقلت تكفى